Ekainaren 26an, ortziralean, goizeko 10:00etan argi soinuekin hasiko dira Erratzuko San Pedro bestak. Ordu berean, haur jokoak izanen dira frontoian. 12:00etan txupinazoa eta ezkil jotzea izanen dira eta ondotik, haur eta gurasoendako bazkaria eginen da Kastonean. Arratsaldeko 17:00etan Izpegiko VI.bizikleta igoera izanen da. Bueltan, haurrendako txokolatada prest egonen da eta sari banaketa ere eginen dute. 20:00etan errepresaliatuen aldeko kontzentrazioaren ondotik, ohiturari eutsiz, mutildantzak, gaita eta larrain dantzak dantzatuta, Baztan zopak izanen dira Kastonean (sarrerak Albantzenea eta Kastonean daude salgai). 23:00etan Zubi puntan kontzertuak adituta, eguna bukatzeko, DJ Txingudi izanen da plazan.
Ekainaren 27an, larunbatean, Pilotaren Eguna ospatuko da. 10:00etako argi-soinuekin iratzarriko dira. Eguerdian, 14:00etako elkarteko paelladaren aurretik, aperitifa izanen dute. 17:30ean binaka, Titin eta Gorrotxategi, Asier Olaizola eta Mikel Goñi; eta lau t’erdian, Olazabal eta Saralegi ariko dira. Ondotik, fronteniseko finala jokatuko da. 21:30ean mutildantzak, gaita eta larrain dantzak dantzatuko dira. Afalondoan, dantzaldia izanen da Trakets taldearekin eta 03:00etatik aitzinera Tirri&Terrirekin.
Ekainaren 28an, igandean, ospatuko da aurten zikiro eguna. Argi soinuekin irekiko dituzte begiak. 11:00etan pilota partidak izanen dira Gorostapolon. Ondotik, bertsoz bertso eta potez pote ailegatuko dira zikiro jatera (sarrerak Zubi punta, Albantzenea eta Iparlan salgai). Bazkalondoa alaitzeko Modesto musikaria izanen dute. 21:30ean mutildantzak, gaita eta larrain dantzak dantzatuko dira. 22:30ean Panpi portugalen eskutik, dantzaldia izanen da, Iparla ostatuan. Eguna Modestoren musikarekin bukatuko da.
Ekainaren 29a, astelehena, da hondar eguna. 10:00etan argi soinuen ondotik, 11:00etan, meza nagusia izanen da. 12:00etarako, mezan barna ibili eta herriko plazara ailegatu orduko, prest izanen da luntxa; mutildantzek girotuta. 12:00etan herri jokoetan ariko dira. Ilunabarrean, Mariatxiak izanen dira herriko plazan: Los Tenanpas y sus mariatxis. 21:30ean mutil dantza, gaita eta larrain dantzak dantzatuko dira. Bestak Hauspolarien dantzaldiarekin bukatuko dira.
Ekitaldiz betetako lau eguneko bestak dituzte ospatzeke erratzuar eta bisitari guztiek.
