Bisitaren helburua lezeak deskubritzea da, «modu ludikoan, dinamikoan eta noski, euskaraz. Bisita klasiko baten informazioa du, baina modu desberdinean: jolasak, txontxongiloak, truko magikoak…». 50 minutuko iraupena du eta 5 urtetik goitiko haur eta familiei zuzendua dago: «mamia ulertu behar da, lekua iluna da eta bisitaria ibiltaria denez, leku batetik bertzera ibiltzeko gaitasuna behar da, hortaz diogu 5 urtetik aurrera».
Bisitaren ondotik «tartea hartzen dut familiekin elkartzeko, argazkiak ateratzeko, hitz egiteko… haurrak biziki kontent egoten dira baina gurasoak ere hurbiltzen zaizkit, erranez umeentzako bisita izateko haiek ere gauza pila bat ikasi dituztela. Haur eta gurasoek zerbait ateratzen badute bisita horretatik, ni pozik».
Geroari begira «agenda oraindik ez da hetsia, baina eskolentzako data batzuk irekiak ditugu eta urtean zehar bertze bisitariei ere eskaintzen jarraitzeko asmoa dugu». Informazioa eskuragarri egonen da horkonpontx.eus eta Sarako Lezeen webgunean eta sare sozialetan.