Kultur elkarteekin ez ezik, kirol taldeekin ere aritzen da lanean; «Saran pilotan, errugbian, eskubaloian eta lasterka aritzeko taldeak dira haundienak. Errugbian eta pilotan, adibidez, 150 lagun inguru aritzen dira».
Izarra errugbi taldeko lehendakarietako bat da Jauregi, eta kontent agertu da nesken taldearekin; «duela bi urte sortu zen, neska talde bat etorri zenean erranez aritu nahi zutela. Joan den urtean hasi ziren Euskal Herriko Ligan parte hartzen eta aurten bigarren mailako txapeldunak izan dira! Neskek bakarrik sortutako proiektu gisa hasi zenak bere fruituak eman ditu. Dinamika polita dute, eta Iparraldean neska talde gutti direnez, bertze herrietatik ere etortzen dira».