Saran Dufau nagusi
Saran Fronte Herritar Berriko Peio Dufauren hautagaitza izan da bozik gehien bildu dituena, % 32,39 lortuta, eta Macronen Ensemble aliantzako Christian Deveze izan da bigarren indarra bozen % 23,55ekin. Eskuin muturreko Batasun Nazionaleko Victor Lastecoueres hirugarren bozkatuena izan da, bozen % 20,16 bilduta.
Gainerakoan, Frantziako Asanblearako bozak parte hartze baxukoak izaten dira, baina aldi honetan, 2022ko emaitzekin konparatuz, parte hartzea igo egin da. Saran hamarretik ia zazpi hurbildu dira lehen itzulian boza ematera, 2022ko bozen lehen itzulian baino % 15,75 gehiago.
| Errolda | 2.116 |
| Boto emaileak | 1.434 |
| Abstentzioa | %32,23 |
| Baliogabeak | 20 (%1,39) |
| Zuriak | 37 (%2,58) |
Senperen eskuin muturra nagusi guttigatik
RN Batasun Nazionalak emaitza onak ukan ditu, eta Senperen, boz gehien bildu dituen hautagaia eskuin muturreko Victor Lastecoueres izan da, bozen % 28,79rekin. Hala ere, alde ttikia atera dio bigarren izan den Peio Dufauren ezkerreko aliantzari, bortz boz baino ez. Dufaurentzat izan dira bozen % 28,66. Hirugarren indarra, berriz, Macronen Ensemble taldeko Christian Deveze izan da (% 20,48).
Senperen ere parte hartzeak goiti egin du. 2022ko bozetan, lehen itzulian % 49,06koa izan zen parte hartzea eta aldi honetan, % 70,28koa; beraz, 21 puntu beheititu da abstentzioa.
| Errolda | 5.605 |
| Boto emaileak | 3.939 |
| Abstentzioa | % 29,72 |
| Baliogabeak | 38 (%0,96) |
| Zuriak | 78 (%1,98) |
Bigarren itzulia igandean
Seigarren barrutian daude Sara eta Senpere eta barruti horretan hiru hautagaik lortu dute igandean, uztailaren 7an, iraganen den bigarren itzulira pasatzea: Peio Dufau (Fronte Herritar Berria, ezkerreko aliantza), Christian Deveze (Macronen Ensemble aliantza) eta Victor Lastecoueres (eskuin muturreko Batasun Nazionala).
