Eguraldi ezin hobea baliatuz iragan ziren Senpereko ihauteriak, otsailaren 3an, jendetza bildurik ongi gozatu dira parte hartzaile guziak. Aurten desfiletik kanpo, besta guzia pilota plazan kokatua zen. Betiko jendetza, mozorrotu, zirtzil, joaldun, dantzari eta bertze, animazio bikaina segurtatu zuten.
Zan Pantzar kiskaldu aitzin, 120 bazkaltiar bilduak ziren eguzki pean, xapelak ongi etorriak ziren. Joaldunek segida hartu aitzin, Zirikolatzeko dantzariek emanaldi ederra eskaini dute. Ondotik, Zan Pantzaren auzi beldurgarria, gure ezbehar guztien errudun baieztatua izan zen. Kantu, musika eta dantzek iraun zuten beranta arte. Txalotzekoak Senpereko Zakuzaharrak taldeko kide guziak, horrelako ekimenaren muntatzeagatik.
