Egoera ikusita «pena» sentitzen du Agerrek, etxebizitzaren arazoa «gabezia garrantzitsua» iruditzen baitzaio: «Bada Zugarramurditik ondoko herrietara bizitzera joan den jendea, hemen ez zuelako fitsik atzematen. Lana bada, jendea Dantxarinera eta Iparraldera mugitzen da, baina Zugarramurdin bizitzeko ez dago tokirik».
Egoera horri buelta ematea dute erronka, «egunerokoan jendeak bizia hemen egitea nahi dugu, etxe huts horiek betetzea, haurrak eskolan izatea...». Eta bide horretan, «etxe zaharrak dituztenak barnean etxebizitzak egitera animatu nahi ditugu, alokairurako edo saltzeko, herriko jendearendako edo honat bizitzera etorri nahi dutenendako, kanpotik datozenak ere ongietorriak baitira». Honela gaineratu du: «Zenbat eta jende gehiago etorri, orduan eta animazio gehiago izanen dugu herrian. Turismoarekin badugu jendea, baina egunerokoan ere herrian jendea izatea nahi genuke».
Asmo horrekin erosi dute apezaren etxea, eta hor lantzeko «bizpahiru proposamen» dituztela esplikatu du: «etxebizitzak egitea, helduendako zerbait egitea...». Erabilera hori, ordea, «herritarrei galdetuta erabaki nahi dugu, zehazki zer den interesgarriagoa ikusi eta ondotik, horretarako finantziazioa eta dirulaguntzak bilatu».
