Senpereko lau gazteak libre utzi zituzten atzo ilunabarrean

Lau gazteen atxiloketa salatzeko mobilizazio jendetsua egin zuten arratsaldean Senpereko Herriko Etxearen aitzinean. Argazkia: NAIZ.EUS

Atzo goizean jendarmeek atxiloturik eraman zituzten lau gazte senpertarrak libre utzi zituzten arratsalde hondarrean. Jendarmeriak atzeman zituen lau azteak higiezinen agentzietan pintaketak egitea egotzita. Arratsaldean Senperetik eta inguruetatik jindako ehunka lagun mobilizatu ziren atxiloketak salatzeko.

Herriko bizian aktiboki parte hartzen duten gazteak

Atxiloketaren berri izan ondotik, Senpere Bai herriko talde abertzaleak atxiloketak gaitzetsi zituen ohar baten bidez. «Polizia frantsesaren operazio horrek Euskal Herriko gazteria kriminalizatzea du helburu, frantses estatuaren betiko norabidea segituz» zioen oharrean.

Gainera, atxiloturiko lau gazte hauek «Senpereko bizian parte hartzen dute, hala nola, besta komitean, gaztetxean, dantza taldean edota SPUC kirol elkartean». Gazte horietako bat hautetsia da Herriko Etxeko gehiengoaren taldean, Senpere Bairekin egindako fusioaren ondorioz.

Talde abertzaleak etxebizitzaren espekulazioaren arazoari heldu zion bere agirian. «Frantses estatuak etorkizunaz kezkatua agertzen den gazteria kriminalizatzea hobesten du, Euskal Herriak etxebizitzaren arloan bizi duen arazoari berehalako erantzun konkretuak atzeman ordez. Etxebizitza turistikoei emandako konpentsazio sistemaren deuseztatzea honen adibide bat da», deitoratu dute.

Mugimendu abertzalearen arabera, frantziar justiziak erabiltzen dituen metodoen helburua «gazteria beldurtu eta kriminalizatzea» da. «Frantses estatuak iraganeko errezetekin segitzen du: Euskal Herritarren gehiengoaren aldarrikapenak ukatzen ditu eta errepresioan tematzen da», deitoratu zuen EH Baik. LAB sindikatuak eta Xuti Gazte! ekimeneko gazteek ere salatu zituzten atxiloketak.

Erlazionatuak

Lau gazte atxilotu dituzte Senperen herriko hainbat higiezinen agentzietan tindaketak egitea leporatuta

Xareta Senpere

Euskal Irratiak jakinarazi duenez, gaur goizaldean lau gazte atxilotu ditu Frantziako Poliziak Senperen. Lehen informazioen arabera, herriko higiez...

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun