Saran azken agurra egin diote Mixel Urbistondo 'Kaiku'ri

Abenduaren 7an, goizean eman zioten azken agurra herrian hainbat ekarpen egin dituen Mixel Urbistondo Kaikuri. Lanbidez hargina, hamabi urtez Herriko Kontseiluan hautetsi ere izan zen.

Urbistondo familia Urruñatik Sarako Hiti baserrirat joan zen bizitzera. Hiru seme izan zituen bikoteak: Xan, Mixel eta Fermin. Azken honek hartu zuen burasoen segida baserrian eta, Xan eta Mixel anaiek hargintza hartu zuten lanbide.

Herrian hainbat lan egin zituzten: Sarako elizako berritze lanetan barneko aldarearen harri pikatuak anaiek egin zituzten, baita Kanboko Xalbador ikastolako zenbait lan ere. Xan anaia zendu zenean, Mixelek jarraitu zuen hargintza lanetan Xan semearekin eta hilarri berrietan oroitarri ikusgarriak egin zituzten elkarrekin.

Mixel Urbistondo harria lantzen.

 

Hainbat trebezia

Bertze hainbat lanetan ere aritu zen Mixel. Erraterako, 2011n Miguel Barandiaranen liburua euskarara itzuli zuen. Urte hartan, auzapezak, Battite Labordek, hainbat egile laudatu zituen:  Erramun Bochoc, Xabier Elosegi, eta bi saratar: Pantxo Michelena eta Mixel Urbistondo, Kaiku.

Urbistondok anitz maite zuen euskal kulturarekin zerikusia zuten ekitaldietara joatea; bertso eta kantu afarietara maiz joaten zen. Baina, batez ere, pilota zuen maite eta ahal zuen partida guztiak ikusten zituen. Sarako herrian ere ekarpen ugari egin zituen. Herriko Kontseiluan hamabi urtez aritu zen eta auzo nahiz herriko seinaleak euskaratzen lan ederra egin zuen.

Urte hauetan guztietan Kaikuene etxean bizi izan da bere emazte Maritxurekin, Xan semearekin eta Christine alabarekin. Hain zuzen ere, etxe honi zor dio bere izengoitia.

Herrian omenaldia

Abenduaren 7an goizean ehortzi zuten 70 urterekin. Herritarrek, omenaldi ederra egin zioten elizan. Battite Laborde Sarako auzapezak ere hitz batzuk eskaini nahi izan zizkion: «egun zurekin liburu bat hetsi da Kaiku, edozein lanetan laguntza ekartzeko hor zinen izan eskuz edo buruz, zizelkari ezin hobea. Euskal Herriko zazpi probintzietan ongi ezagutua, hamabi urtez herria zerbitzatu, axuantan kontseiluan desafio guziak altxatuz, etorri da Mixel berresteko tenorea, ez ahantzi eremu berri horretan sartzean zure lasaitasuna kapelua buruan atxikitzea. Bide on eta ikusi arte!».

Omenaldia borobiltzeko, txalaparta jo zuten, aurreskua dantzatu eta  Amets Arzallusek bi bertso kantatu zizkion. Gorpua Pettan Errandonea, Stéphane Barneix, Mixel Elizalde eta Battite Laborde Herriko Kontseiluko kideek eraman zuten. Lauak berdin beztituta joan ziren elizkizunera: atorra zuriz, galtza urdin eta kapelu beltza buruan.

Ttipi-ttapako berriemaile den Ganexek ere  «ene partetik, dolumin beroenak familia guziari. Ez adiorik Kaiku, ikusi arte!» hitzak eskaini nahi izan dizkio.

Erlazionatuak

Mixel Urbistondo saratarra hargin lanean duela hamasei urte

Xareta Sara

Berriki zendu da Kaikueneko Mixel Urbistondo saratarra. Hargin lanarengatik izan zen ezagun eta bere lanbide hori ezagutzeko elkarrizketatu zuen 20...
Sagarnoa egiten Sarako Kaikueneko Mixel Urbistondorekin

Xareta Sara

Lanbidez hargina bazen ere, bertze hainbat arlotan ere ezagun zen Mixel Urbistondo saratarra. Lehenbizkai auzoko Kaikuenera hurbildu ziren Ttipi-Tt...

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun