Maiatzaz geroztik, ortzegun guziz 09:00etatik 13:00etara biltzen dira Sarako plazan. Joana Urbistondo Sarako Merkatua elkarteko kideren hitzetan, «hamar bat ekoizle biltzen gara, baita eramateko janaria prestatzen duena, talogilea eta bertako sei eskulangile ere». Egoerak hala behartuta, «postuen eta bezeroen artean segurtasun tartea errespetatzen» dutela ere azaldu digu eta «merkatuak sarrera eta irteera ditu eta hortaz, ezin da gibelerat egin».
Aitortu digu, «itxialdi garaian, barazkigileei eskaera handitu zaiela eta orokorrean denak etxetik saltzeko edo banaketak antolatzeko moldatu» direla. Baina aldi berean, «ostatuak, jatetxeak eta eskoletako jangelak itxiak zirenez, salmenta guttitu» dela ere onartu du. Halere, kontent dago «herritar eta turistak pixkanaka merkatura etortzen hasi direlako». Bide batez, «herriko plazarat etortzeko» deia ere luzatu du, «denei irekia da».