Helburu argia dute denek, lurpeko bisitariari “seigarren kontinentea” deskubritzeko aukera ematea, hurbil izan arren hain ezezagun zaizkigun baliabide hauek ezagutzeko aukera eskainiz. Beste ekintza batzuen artean, taldeak www.lurpea.eus webgunea jarri zuen martxan eta bertan jaso daiteke kobazulo guztien informazioa.
Balio historiko zein natural handiko leku hauetan, gizakiaren iraganaren arrasto garrantzitsuak mantendu dira, eta zenbait kasutan, berauen hormak oraindik kondaira eta mitoei loturiko errito herrikoiez hitz egiten digute.
Eskualdeko lezeetan martxoaren 13an
Martxoaren 13ean, Oñatiko Arrikutz kobazuloan eta Sara, Urdazubi eta Zugarramurdiko lezeetan ospatuko dute Kobazuloen Eguna.
Sarako lezearen sarreretan 2x1 promozioa eginen dute igandean.
Zugarramurdiko lezeetan, aurten, lehendabiziko aldiz eta Itxusi Argazki Elkartearen laguntzarekin argazki rallya antolayu dute Lezeen Eguneko asteburuan, martxoaren 12an eta 13an.
Urdazubin bertze jarduera berezi bat eginen dute, arkeologia esperimentaleko tailer bat izanen baita. Iñaki Libanok Silex materialarekin egindako hainbat erreminta sortzeko lanen erakustaldi bat eginen du, hauen erabilera (bultzagailuak, bramaderak…) eta sua piztuko du Urdazubin duela 15.000 urte bezala.
Urdazubiko bisita gidaturako sarreren prezioko % 50en deskontuaz gain, aipatutako erakustaldia igande goizeko 11:30ean izanen da (doakoa), Ikaburu-ko haitzuloetako lorategian.
