Gazte denboran (eta oraindik orai) palaz aritu zen Iriarte eta Espainiako txapeldun izan zen zenbait urtez. Horretaz gain, kultur arloan ere nabarmendu da eta urtetan bizi izan den Zangozako Nora Abesbatzako zuzendari izan da eta Zugarramurdiko historiari buruzko liburuak ere eman ditu argitara.
1944ko otsailaren 21ean jaio zen Fermin Iriarte Zugarramurdin. 24 urtetan hasi zen tituluak pilatzen, 1968an Tuteran txapeldun izan baitzen. 1969an Zangozako Cantolagua pilotalekuaren inaugurazioan parte hartu zuen eta Zangozako taldean eskubaloiko atezain ere izan zen. 1971ean Madrilen federatu zen eta 1972an pala eta larruzko paleta txapelketak irabazi zituen. Urte hartan, gainera, Madrilekin aritu zen eta Federazio arteko txapelketan Nafarroari irabazi zion, Larumberekin bikote eginez, Casado eta Egañari 40-34 irabazita Labriten. 1973an Espainiako klub arteko txapeldun izan zen eta 1974an, pala laburrarekin Federazio arteko txapelketa irabazi zuen. Euskal-Jai, Galarreta eta Balda pilotalekuetan palako profesionala izan zen. Berrikiago, 1997 eta 1999an Zugarramurdiko pala txapelketa ere irabazi ditu.
