[ARGAZKIAK] Bigarrenarekin berdinketa eginda, hirugarren sailkatu du Joanes Illarregi leitzarra Gernika-Lumoko saioan

1.600 bat bertsozale bildu ziren larunbat arratsaldean Gernika-Lumon, lehenbiziko itzuliko hirugarren final aitzinekoaz gozatzera. Sei bertsolari aritu ziren kantari, ordena honetan: Agin Laburu Rezola, Joanes Illarregi Marzol leitzarra, Ane Labaka Mayoz, Aitor Mendiluze Gonzalez, Aner Peritz Manterola eta Aitor Bizkarra Ruiz.

Ariketa puntuagarriak egin ondotik, Aitor Mendiluzek bildu zituen puntu gehien, 713 puntu. Hala, final aitzinekoen bigarren itzulirako txartela lortu du eta azaroaren 21ean Donostian kantatuko du.

Honela gelditu zen puntuazioa:

1. Aitor Mendiluze Gonzalez: 713 puntu
2. Aner Peritz Manterola: 707 puntu
3. Joanes Illarregi Marzol: 707 puntu
4. Ane Labaka Mayoz: 703,5 puntu
5. Aitor Bizkarra Ruiz: 694 puntu
6. Agin Laburu Rezola: 687 puntu

Final aitzinekoetako lehenbiziko itzuliko azken saioa larunbatean izanen da, azaroaren 14an, Miarritzen. Bertze sei bertsolari ariko dira bertsotan: Andoni Rekondo Izagirre, Julio Soto Ezkurdia, Maddalen Arzallus Antia, Maddi Ane Txoperrena Iribarren (Hendaia-Lesaka), Oier Etxeberria Zubimendi eta Sustrai Colina Acordarrementeria. Sarrerak bertsosarrerak.eus atarian salgai daude.

Final aitzinekoetan orain arteko sailkapena

Miarritzeko saioarekin jakinen da zein izanen diren final aitzinekoen bigarren itzulian kantatuko duten bertsolariak. Oraingoz, lehenbiziko itzulitik bigarrenera zuzenean sailkatutakoak hauek dira:

• Amets Arzallus Antia
• Nerea Ibarzabal Salegi
• Aitor Mendiluze Gonzalez