Baztan-Bidasoko Aktibazio Plana eskualdearen garapenerako eta eskualdea martxan jartzeko tresna da. Ekintza eta proiektu ezberdinen bidez, eskualdeko erronkei modu bateratuan aurre egiteko helburua du.
Hainbat gai lantzen ari dira, eta horietako bat gazteak eta talentua da. Gaur egungo egoera zein den jakiteko, Baztan-Bidasoko pertsonei, eta bereziki gazteei, eman nahi diete ahotsa galdetegi honen bidez: «Konturatu gara gutxi dakigula eskualdean dagoen talentuari, ezagutzari eta prestakuntzari buruz». Era berean, bertako biztanleek, eta bereziki gazteek, euren bizi proiektua eskualdean garatzeko duten errealitatea zein den ere bildu nahi dute.
Bildutako erantzunak baliagarriak izanen dira eskualdeko gazteek beren bizi eta lan proiektuak eskualdean garatu ahal izateko behar dituzten aukerak eta baliabideak sustatu ahal izateko.