Euskaraldiko txapak paratzeko eguna

Aurtengoa Euskaraldiaren laugarren edizioa izanen da. 2018an egin zuten lehenbizikoa, 2020an bigarrena, 2022an hirugarrena eta eskualdean ere izan zuten oihartzuna. Eskualdeko datuei erreparatuz, 2018an 4.016 lagunek eman zuten izena, 3.449 ahobizi eta 567 belarriprestek. 2020ko edizioan kopuruak goiti egin zuen: 4.094 herritar animatu ziren Euskaraldian parte hartzera, 3.684 ahobizi eta 410 belarriprest. Aldi hartan, ariguneak ere sortu zituzten, eta eskualdean 255 sortu zituzten. 2022an, ordea, norbanakoen izen ematea jaitsi egin zen: 3.676 lagun apuntatu ziren: 3.295 ahobizi eta 381 belarriprest. Ariguneak, berriz, gehiago izan ziren: 298.

Aurtengo edizioan izena emandakoak zenbat diren hamaika eguneko ariketa hau bukatzean jakinen dugu, oraindik izena emateko epea irekia baitago. Berandu dabiltzanek lotura honetan egiten ahal dute.

 

Izena ematerakoan, ahobizi edo belarriprest rola aukeratu behar da. Ahobizi rola hartzeak euskaraz entenditzen duten guziekin momenturo euskaraz egiteko konpromisoa adierazi nahi du; kideek euskaraz entenditzen ote duten ez badaki, lehenbiziko hitza, beti, euskaraz eginen du; euskaraz entenditzen badute, euskaraz segituko du.

 

Belarriprestek, berriz, euskaraz noiz eta norekin egin erabakiko dute. Agian, beti ez dute euskaraz eginen entenditzen duten guziekin, baina euskaraz dakitenek berari euskaraz solas egitea nahi dute, eta horixe eskatuko die modu esplizituan.

 

Euskaraldia Hika Euskaraldian parte hartzeko modu bat da. 2020ko edizioan, egitasmo orokorretik haratago, ekimen propioz Hikaldia sortu zuten hainbat herritan. Hurrengo Euskaraldian, 2022koan, herri gehiago animatu ziren hikaldian parte hartzera, eta laugarren edizio honetan, 83 dira parte hartuko dutenak, tartean, eskualdeko hauek: Arantza, Bera, Etxalar, Goizueta, Igantzi, Leitza, Lesaka.

Euskaraldia Hikaren bereizgarri, H daramate Euskaraldiko txapek. Horrek «Nahi baduzu, nirekin hika egiten ahal duzu» erran nahi du.

Hamaika egunetik haratago

Euskararen erabilera handitzeko asmoz, hamaika eguneko ariketa proposatzen du Euskaraldiak, baina helburua hortik haratago doa, antolatzaileek erran bezala, «ez baita egun horietara bakarrik mugatzen den dinamika; euskararen erabilera aktibatzeko mugimendua elikatu eta gizartean errotu nahi duen ekimena baizik». Alegia, «Euskaraldiaren helburu nagusia hizkuntza ohituren inertziak astindu eta herritarrek euskara gehiago erabiltzeko pausoak ematea da, eta, horrez gain, entitateek ere euskaraz bizitzeko aukerak eta neurriak hartzea sustatu nahi da». 

Antolatzaileek jarrera aktiboa izateko deia egin diete herritarrei.