Gaur egun ezinezkoa litzateke mundua entenditzea telefono mugikorren presentziarik gabe. Beharbada, hori da etxetik ateratzean sakelara sartzen dugun lehenbizikoa, gure egunerokotasunaren nahitaezkoa bihurtu delako. Smartphoneak erabat aldatu digu bizitza, baita komunikabideoi ere.
Jakinda ERRAN.EUSen sartzen diren 10 pertsonetatik ia 9k telefono mugikor batetik egiten dutela, komunikabideontzat garrantzitsua da ERRAN.EUSen eskaintzen diren edukiak prestatzerakoan smartphoneek dituzten aukerak eta baldintzak presente izatea. PDF aberastuekin, orain arteko PDF arruntekin alderatuta, errealitate horri erantzun nahi zaio, erabilgarritasuna eta nabigazio esperientzia nabarmen hobetuz gehiengoarentzat.
Zer da zer?
PDF digitala: Izenak adierazten duen bezala, euskarri digital batean ikusteko PDFa da. Izan tableta batean, ordenagailuan edo, pantailaren neurriarengatik nekezago bada ere, baita mugikorrean ere. PDF hauekin, funtsean, aldizkaria paperan ikusi beharrean pantaila batean ikusiko dugu, bertzerik ez. TTIPI-TTAPAren hemeroteka PDF digitaletan dago artxibatua eta hemen kontsultatzen ahal da.
PDF aberastua: lehenik eta behin, PDF aberastua bereziki egokia da telefono mugikorretan edo pantaila ttikietan ikusteko. Itxuraz ohiko PDF digitalaren berdina da, baina kasu honetan, artikulu batean klikatuz gero, testua formatu librean irekitzen da mugikorraren pantailan aski erraz leitzeko. Eta gainera, artikuluen ondoan dauden ikonoen gainean klikatuz gero, izenak dioen bezala, PDFa eduki osagarriekin aberasten da: argazki galeriekin, audioekin, bideoekin, esteka edo loturekin jada Interneten dauden eduki erlazionatuetara eta baita orrialdeen saltoak egiteko botoiekin ere. TTIPI-TTAPAren azkeneko PDFak PDF aberastuak dira.
Egunotan, posta elektronikoa duten harpidedunek eta bazkideek ERRAN.EUSeko mezu bat hartu dute
Harpidedunak eta bazkideak erdigunera ekartze aldera, gainerako erabiltzaileek ez dituzten abantailak dituzte TTIPI-TTAPA eta ERRAN.EUSen lagun direnek. Eta abantaila horiei ERRAN App-aren edo ERRAN.EUS plataformaren bitartez zukua ateratzeko, nahitaezkoa da erabiltzaile gisa erregistratzea harpidetza edo bazkidetza egitean emandako posta elektronikoarekin. Lehendik erregistratuta ez daudenek egunotan hartu dute ERRAN.EUSeko mezu bat euren posta elektronikoan. Mezu horretan, ERRAN aplikazioa deskargatu eta erregistratzerakoan erabili beharreko behin-behineko pasahitza ere ageri da. Dena den, erregistratzerakoan arazoren bat izanez gero, deitu 948 63 54 58 telefonora edo idatzi info@ttipi.eus helbidera. Guk lagunduko dizugu.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!