Euskaraldian izena emateko aukera izanen da larunbatean Donezteben

Bi hilabeteren buruan hasiko da Euskaraldiaren laugarren edizioa. Zehazki, maiatzaren 15etik 25era izanen da eta tarte horretan Euskaraldiaren txapa soinean eramanen dute milaka eta milaka herritarrek, batzuk ahobizi txapa eta bertzeek belarriprest txapa.

Bada, horri begira, joan den larunbatean ireki zuten Euskaraldian izena emateko epea eta nahi dutenek lotura honetan egiten ahal dute. Hala ere, Malerrekako eta Bertizaranako batzordeak larunbat honetan, martxoaren 22an, izena emateko mahaia paratuko du Doneztebeko Santa Luzia plazan. 10:30etik 13:30era han izanen dira eta izena emateko aukera izateaz gain, informazio gunea paratuko dute.