Zurekin mintzapoza praktikatu nonahi, noiznahi izenpean hasi du Euskaltzaleen Topaguneak Solaslaguna programaren izen ematea. Orain arte funtzionatzen duten taldeez gain, gainera, irailean talde berriak sortuko dituzte.
Izena ematea hemen egin daiteke, edota bertzela eskualdeko hainbat euskaltegi, liburutegi, udaletxe eta bertzelako tokietan paratuko dituzten esku orrien bidez egiteko ere aukera izanen da.
Solaslaguna ekimenaren funtsa euskara modu informalean praktikatzea da. Bi rol daude ekimenaren barrenean: Bidelaguna eta Bidelaria eta astean behin elkartzen dira denak ordutebez. Bidelaguna euskaraz ongi dakien pertsona da eta bilera dinamizatzeko eta gainerako taldekideei laguntzeko dago. Bidelaria, aldiz, euskara praktikatu nahi duen pertsona da. Talde bakoitzean Bidelagun bat dago eta gainerakoak Bidelariak dira.
Asteroko hitzorduez gain, bertzelako hainbat ekimen ere izaten dituzte: mendi irteerak, bazkariak, bisita gidatuak. Mintzalagun eguna... Ekimen horietan eskualdeko kideez gain, gainerako lurraldeetako parte hartzaileekin ere elkartzen dira.