Duela gutti argitaratu zituen TTIPI-TTAPAk 2001etik 2021era bitarteko biztanleriaren datuak. Orokorrean, bilakaera positiboa erakusten zuten zenbakiek baina udalerriz udalerri joera bertzelakoa zen: herri gehienek beheranzko joera hartua dutela. Geroztik aurtengo datuak argitaratu ditu Espainiako Estatistika Institutuak, eta Sarako eta Senpereko datuak kenduta (ez dago 2022ko daturik), TTIPI-TTAPAren eremuko 25 udalerrien artean hamabik galdu dute biztanleria joan den urtetik. Bereziki Oizek (-% 6,06), Urdazubik (-% 5,17), Zugarramurdik (-% 4,27), Zubietak (-% 2,63), Aranok (-% 2,63) eta Arantzak (-% 2,48).
Beheranzko joera ttikiagoa izan dute bertze sei udalerrik: Areso (-% 1,82), Urroz (-% 1,12), Igantzi (- %0,68), Beintza-Labaien (-% 0,47), Doneztebe (-% 0,16) eta Baztan (-% 0,15).
2021etik 2022ra biztanleria kopurua irabazi dutenak, berriz, hamahiru udalerri dira. Bereziki Donamariakoa (+% 3,10), Saldiaskoa (+% 5,26) eta Eratsungoa (+% 2,74) dira igoerarik aipagarrienak. Eta gainerakoak honela daude datuak: Ezkurra (+% 1,47), Ituren (+% 1,38), Goizueta (+% 0,87), Leitza (+% 0,63), Bertizarana (+% 0,50), Elgorriaga (+% 0,47), Sunbilla (+% 0,45), Bera (+% 0,32), Lesaka (+% 0,29) eta Etxalar (+% 0,24).
