22. Korrika

Korrikaren lekukoa gauerdian ailegatuko da berriz eskualdera

Ttipi-Ttapa 2022ko api. 8a, 14:15
2019ko Korrikan Leitzan hartutako irudia.

Euskararen aldeko lasterketa erraldoiaren lekukoa Leitzara ailegatuko da gauerdian eta handik Basakabiko bidea hartuko du. Ezkurran barna, Zubieta, Ituren, Elgorriaga, Doneztebe eta Sunbilla zeharkatuko ditu Korrikak. Sunbillatik Igantziko Bentetara bide berdetik edo trenbidetik joanen da, eta Igantziko Bentetan Igantzira joanen da gero. Lesaka eta Bera izanen dira hurrengo herriak. Ibardinen barna Urruñara joanen da, baina Azkainetik pasatuta, Senpere eta Saran izanen dugu berriz Korrikako lekukoa. Zugarramurdin ere ibiliko da eta Ainhoako bidea hartuta utziko du eskualdea. Ikusi hemen eskuz esku eta kilometroz kilometro lekukoa nork eramanen duen. 

Azken orduan aldaketak egin behar izan dituzte Doneztebetik Berarako ibilbidean, eta Doneztebe-Berrizaun (Igantziko Bentak) eta Lesakako zubitik Berara arteko zatiak Bidasoko bide berdetik eginen ditu Korrikak. Adierazi dutenez, «tarte horretan Korrika egin ahal izateko baimenak lortzeko oztopoa» izan dute, «urtarrilaren 25ean Estatuko Aldizkari Ofizialean argitaratu zen ebazpenak hainbat errepide erabiltzeko murrizketak eragin» dituelako.

Horrek sortuko zituen eragozpenak aintzat hartuta, «Korrika egiteko aukera lehenetsi» nahi izan dute, eta eskerrak eman nahi izan dizkiote «ezinegona sortu diogun jendeari, ulerkorrak izan direlako, eta ekimenean parte hartzen jarraituko dutelako».

Bertzetik, gaur 23:00etik aitzinera Korrika zuzenean ikusteko aukera izanen da ERRAN.EUSen.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun