Koronabirusa

Asteazken honetan hasiko dira Donezteben haurrendako COVID txertoak jartzen

Txertoak hozkailuan altxatzen.

Astelehen goizean ailegatu dira Nafarroara haurrendako 18.000 COVID txerto eta asteazken honetan bertan, abenduak 15, hasiko dira txertatzen Donezteben kiroldegian. Osasun Departamentuak jakitera eman duenez, 2012an, 2011n eta 2010ean sortutakoekin hasiko dira (11, 10 eta 9 urtekoekin), eta pixkanaka jausten joanen dira adin-tarteka, 5 urtera iritsi arte.

Zehaztu dutenez, «haurra gurasoetako edo tutoreren batekin baldin badoa txertatzera, nahikoa izanen da bere nortasuna egiaztatzea; bertze pertsona batekin baldin badoa, aitak, amak edo tutoreak sinatutako baimena aurkeztu beharko da».

Covid-19 txertaketarako lan-taldearen arabera, «haurren txertaketak gaixotasunaren eragina guttituko du kolektibo horretan, eta transmisioa murriztu dezake familian, ikastetxeetan eta komunitatean, eta populazio ahulenak babesten lagunduko du». Era berean, lan-taldearen arabera, txertoak % 90,7ko eraginkortasuna du COVID sintomatikoaren aurrean, eta, oro har, kontrako erreakzioak 16-25 urtekoen taldean hautemandakoak baino ttikiagoak dira.

Oraingo hau txertoen lehen bidalketa da eta kanpainaren hurrengo entregetan osatuko da. Haurren zitazioa, ahal dela, SMSak bidalita eginen dute —pixkanaka bidaliko dituzte aste hasieran—, eta arrisku handiko herritarrei telefonoz deituko diete.

Gomendioa: gaixotasuna pasatu badute, dosi bakarra

Gaixotasuna izan duten 5 eta 11 urte bitarteko haurrek, berrespen-data edozein dela ere, dosi bakar bat hartuko dute, infekzioa diagnostikatu edo sintomak hasi eta 4 astera. Lehenengo dosia hartu ondotik infekzioa pasatzen bada, indarberritu ondottik bigarren dosi batekin osatuko da txertaketa, eta infekzioaren 4 aste igaro ondotik, 8 asteko tartea utzi beharko da lehenengo dosiarekiko.

Helduekin bezala, txertoa hartu ondotik, txertoa hartu duen haurra 15 minutuz zainduko dute, berehalako erreakzioak detektatzeko. Erreakzio alergiko larri baten aurrekaria duten pertsonekin, arrazoia edozein dela ere, txertoa hartu eta 30 minutuz zainduko dute erreakziorik ez dagoela ziurtatzeko.

Gainera, datozen hilabeteetan 12 urte betetzen dituzten 11 urteko haurrek COVID-19aren aurkako txerto pediatrikoaren dosi bat hartuko dute. Lehen dositik bigarrenera 12 urte betetzen baldin baditu, azken hori helduen dosi bat izanen da (12 urtetik aurrera gomendatutakoa), eta 8 asteko epea izanen du bigarren dosirako.
 

Gaur jasotako pediatriako txertoen irudia

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun