Etxalarko Mikel Irigoienen haztegiak, iaz bezala aurten ere, Zilarrezko Saria eskuratu zuen zerrien Bizitza Luzeraren kategorian. Baztango bi zerri-haztegik ere eskuratu zuten sari bana aurtengo edizioan. Batetik, Berroetako Juana Mari Etxenike eta Lorenzo Maritorenaren zerri-haztegiak, eta bertzetik Gartzaingo Maria Pilar Aleman Goñiren haztegiak, brontzezko sari bana eskuratu zituzten Produktibitatearen kategorian (ume kopurua) eta zerrien Bizitza Luzeraren kategorian, hurrenez hurren.
Sari horien bidez, zerri-aziendak dituztenek ekoizpenaren eraginkortasuna eta kalitatea etengabe hobetzeko egiten duten lana sustatu eta aitortu nahi da. «Ustiategi horientzat, horrelako sariek egunero egiten duten ahalegina aitortzen dute», adierazi zuen Francisco Martín zerri-haztegietako aholkulari-teknikariak.
Produktibitatea eta errendimendua
Sarietarako izendapenak ustiategien produktibitate eta errendimendu parametroetan oinarritzen dira, eta parametro horiek urtero hobetzen ari dira abeltzainek egiten duten etengabeko ahaleginari esker. Sariak kategorien arabera banatzen dira, irizpide teknikoen arabera, hala nola erditze-tasaren neurketa, zenbakizko produktibitatea eta bizitza-luzera. Sarietara aurkezten diren ustiategiak kategoria desberdinetakoak dira, eta kategoria horiek zerri kopuruaren arabera ezarrita daude (1. kategoria 200 zerrama bitartekoak, 2. kategoria 500 zerrama bitartekoak, 3. kategoria 1.000 zerrama bitartekoak, 4. kategoria 2.000 zerrama bitartekoak eta 5. kategoria, 2.000 zerrama baino gehiagoko ustiategiak).
