Naroa ELIZALDE ETXEKOLONEA

«Klubak orain artean izan ez ditugun aukerak emanen dizkigu»

Ttipi-Ttapa 2021ko abu. 1a, 10:00
Gaztetan pilota utzi behar izan zuen Elizaldek, neskarik ez zegoelako.

Ados pilota klubaren sorreraren berria «ilusioz» hartu zuen Naroa Elizalde Etxekoloneak (Zubieta, 1997) eta, horren berri izan bezain agudo, «dudarik egin gabe» bertan parte hartzea erabaki zuen: «pilotan murgilduta segitzeko aukera hori zela ikusten nuen...».

Klubari esker, «entrenamenduak, asegurua, kontratua...» izanen dituzte pilotariek: «orain arte izan ez ditugun aukerak emanen dizkigute». Elizalderen ustez, «maila hobetzeko baliabide horiek beharrezkoak dira». Eta, klubaren sorrerarekin, kirolariek aldaketak egin beharko dituztela uste du: «orain artean partidaren bat genuenean norberak erabakitzen zuen zenbat eta noiz ari». Orain, berriz, «talde bat» izanik, «konpromisoa» hartzeko beharra ikusten du: «denbora gehiago eskaini, entrenamenduak egin, zaindu...».

«Hobekuntza handiak»

Emakumezkoen pilotari «ikusgarritasun handiagoa» emateaz gain, kluba «gazteen etorkizuna bermatzeko» giltza izanen dela iruditzen zaio: «egun klubean gaudenok ttikitan utzi behar izan genuen eta ondokoek aukera izatea garrantzitsua da».

Gehiago ere bada: «atzetik heldu direnak gogor heldu dira, maila ona dute eta horrek ikusgarritasunean ere eragina izanen duela uste dut». Modu berean, gainera, «aurrera egiten» ere lagunduko duela iruditzen zaio. Argi du «denbora» behar izanen dela, baina «baldintzak hobetuz, baliabideak jarriz, laguntzak emanez...» berdintasunerantz pausoak eman daitezke: «fisiologikoki emakumezko eta gizonen aldea kontuan hartuz, indar aldetik zailagoa izanen da baina baldintza aldetik, epe luzera begira, ez dut ezinezkotzat jotzen baldintzak berdintze hori».

Erlazionatuak

Plazak denonak direlako

Ttipi-Ttapa 2021 abu 01 Mendialdea

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun