Lehenbiziko txapelketan plazaz plaza ibili dira, «pilotaleku irekietan jokatuz ikusleengandik hurbil egon nahi dugulako eta gure jokoa ikusarazi nahi dugulako». Horretarako, partida gehiago, kontratupean eta «aseguru eta soldata batekin» jokatzen dituzte. Etxebesteren ustez, baldintzak «nabarmen» hobetu dira eta «gehiago» hobetuko direlakoan dago: «pilotariok gure maila eman nahi dugu pilotalekuan, eta baldintza horiek lagungarri dira». Baldintzak, ordea, ez dira aski, «konpromisoa» ere behar da. Hortaz, «gehiago entrenatu, forma fisikoa zaindu eta pilotalekuan orduak» pasatzen ditu beratarrak «ahalik eta maila onena emateko asmoz».
Egindako bideari hurrengoek segida
Urte guttitan «aurrerapauso handiak» eman diren arren, Etxebesteren arabera, «egiteko aunitz» dago eta bide horren parte-hartzaile sentitzea «pozgarria» da: «ezinezkoa zirudiena bizitzen ari gara, guk ez genuen erreferenterik eta bat-batean mugimendu honekin aurkitzeak ilusio handia eragin digu, indar haundia eman digu». Eurek egin dutenari ondokoek segida emanen dietela ikustea ere aberatsa da berarentzat: «gaztetxoek Plazaz plaza txapelketan gure aitzinetik partida jokatzeko aukera dute, esperientzia hartzen ari dira... Hagitz maila ona dute eta aitzinerago maila oneko pilotariak ikusiko ditugu».
