Javier Remirez Lehendakaritza, Berdintasun, Funtzio Publiko eta Barne kontseilariak eman du gaur eskabide horren berri. Justiziaren esku utzi duten foru arau berriak orain arte indarrean dauden murrizketak bere horretan uzten dituela erran du, eta helburua neurri horiek abuztu osoan luzatzea dela. Ondorioz, kutsatuen intzidentziarik handiena duten herrietan etxeratzeko ordua egonen da abuztu osoan: 01:00etik 06:00etara.
Datuen eboluzioaren arabera aldaketak egon daitezkeela erran du: «Hauxe da orain egoera epidemiologikoa; neurriak beharrezkoak dira, neurrizkoak, eta premiazkoak garai honetarako». Etxeratze agindua ezartzen dute hamalau egunetan metatutako intzidentzia 250 kasukoa baino handiagoa bada, eta zazpi egunean 125ekoa edo handiagoa bada.