Koronabirusa

Zer egin koronabirusean positibo den pertsona baten kontaktu zuzena baldin banaiz edo sintomak izanez gero?

Ttipi-Ttapa 2021ko uzt. 16a, 15:42

Zalantzak argitzeko, Lesakako Osasun Etxeko arduradunek argibide zehatzak eman dituzte. Eta horrekin batera, «behin baino gehiagotan eta bereziki gazteenen aldetik» sufritzen dituzten portaera desegokiak direla eta, «osasun etxeko langileekiko errespetua» eskatu dute. «Gu ez gara egoera honen errudunak eta gure esku dagoen guztia egiten ari gara lan-txandak bikoiztuz eta asteburuetan atseden egunik hartu gabe. Mesedez, errespetua telefonoa hartzen dutenekiko eta osasun-langileekiko!» galdegin dute.

Nortzuk egon behar dute konfinatuak?

  • Sintomak dituzten guztiek probak egin arte konfinatuta egon behar dute, berdin da txertatuta egon edo ez egon; eta positiboa ateraz gero, kasu bihurtzen dira.
  • Behar bezala txertatutako kontaktu asintomatikoek ez dute konfinatu behar, baina bereziki saihestu behar dute pertsona zaurgarriekin kontaktuan egotea, musukoa behar bezala erabili behar dute eta interakzio soziala saihestu behar dute. Sintomekin hasiz gero, berehala jakinarazi behar dute osasun etxera testak egiteko. Ez zaie PCRa egitea eskatuko, non eta ez diren osasun langileak edo zahar etxeetako langileak.
  • Kontaktu estuak eta txertatu gabeko bizikideak. Horiek guztiek konfinatuta egon behar dute eta PCR proba egin hasieran eta amaieran.

Nola eginen dute gaixoen segimendua?

Sintomatologia duten paziente positiboei eta kalteberak diren taldeetako pazienteei beren egoerak eskatzen duen segimendua eginen diete.
 Sintomarik ez duten edo arras sintoma arinak dituzten paziente positibo asintomatikoei telefonoz deituko diete proba diagnostikoa egin eta 10. egunean, bilakaera ikusteko eta alta berresteko.

Sintomarik ez duen pazientea sintoma hauekin hasten bada:


  • Sukarra.
  • Hotzikarak.
  • Aire faltaren sentsazioa
.
  • Eztula
.
  • Bularreko min edo presio iraunkorra
.
  • Beherakoa
k.
  • Gorakoak.
  • Buruko mina.
  • Nahasmena.


Horrelako egoeran osasun etxera deitu behar da  619 70 08 39 telefono zenbakira 
edota 112 telefono zenbakira osasun zentroa itxita egonez gero (larrialdietako ordutegian).


Gogoratu:

  • Konfinamenduari eustea sintomak hasten direnetik edo proba diagnostikoa egiten denetik 10 egun igaro arte.

  • Likido ugari hartzea.

  • Tenperatura maiz hartzea.

  • Atseden hartzea.

  • Arras garrantzitsua da osasun zentroari eman diozun telefono zenbakian esperoan eta eskuragarri egotea, beraien jarraipen-deiei erantzuteko.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun