COVID-19: Azken datuak

Hamasei positibo atzeman zituzten atzo: hamabi Malerrekan, bi Bortzirietan eta bana Baztanen eta Leitzaldean

Ttipi-Ttapa 2021ko uzt. 9a, 07:15

Positibo eman duten pertsonek beren etxeetan isolatuta gelditu behar dute, guttienez 10 egunez, osasun-segimendua egin eta beren bilakaera ikusteko, nahiz eta auniztan prozesu arinak izan.

Azken datuen arabera, gure lurraldean atzo hamasei positibo atzeman zituzten: hamabi Malerrekan, bi Bortzirietan eta bana Baztanen eta Leitzaldean. Nafarroa osoko behin-betiko datuei erreparatuta, atzo 275 positibo atzeman zituzten eta, atzo ere, hiru pertsona ospitaleratu zituzten eta jada ospitaleratutako bat ZIUan sartu zuten baina ez zen inor hil.

Gure lurraldean pandemiaren hasieratik metatutako positiboak errepasatuz gero, atzo arte 499 dira Doneztebeko osasun eremuan (Malerreka+Bertizarana) atzeman dituztenak, 723 Elizondoko eremuan (Baztan+Urdazubi+Zugarramurdi), 456 Leitzako eremuan (Arano+Areso+Goizueta+Leitza) eta 536 Bortzirietan.

Nafarroa osoko datuei dagokionez, atzo, uztailak 8, 2.069 proba egin zituzten (- PCR eta - antigeno proba) eta horietatik 275ek positibo eman zuten (% 13,3)

COVID-19ak jota, atzo, uztailak 8, hiru pertsona ospitaleratu zituzten eta jada ospitaleratutako bat ZIUan sartu zuten baina ez zen inor hil. Alta eta bajen balantzea egin ondotik, orain 28 daude ospitalean, horietatik 10 ZIUan.

Birusak eragindako infekzioen intzidentzia metatuari dagokionez, atzoko kasuak kontatuta 66.335 pertsonakoa da, eta heriotza kopurua 1.193koa.

Nafarroan 663.529 pertsona txertatu dituzte atzoko egunera arte. Atzo, uztailak 8, 8.410 txerto paratu zituzten eta, oraingoz, 288.672 pertsonek hartu dituzte bi dosiak.

Zalantza txikienarekin testa egitera joan eta bigarren PCRa egiteko orduan ez hutsik egin

Helburua ahalik eta kutsadura gehien atzematea da, bereziki harreman sozialak eta familiarrak areagotzen diren garai hauetan. Orain arte, baheketen eta sintomen ondorioz egin diren proben bidez, guztira 1.335 kasu detektatu dituzte soilik Salouko agerraldiarekin lotutakoak. Alde horretatik, atzo atzemandako positiboen %75a 15-29 urte bitarteko adin-tartekoak dira, eta kutsatutakoen batez bertzeko adina 25,6 urtekoa da.

Gizartea

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun