Gauzak horrela, ostatu-jatetxeen barnealde guztiak maiatzaren 17tik aitzinera edukieraren % 30ean zabaldu ahal izanen dira, eta edukiera mugarik gabe establezimendu horretan airearen kalitatea neurtzen duen CO2 neurgailurik izanez gero. Horretarako, tresna horrek beti erakutsi beharko ditu 800 ppm-tik beherako baloreak (milioiko zatiak).
Sektoreko ordezkariek adierazi dutenez, establezimendu gehienek CO2 neurgailu horietako bat erosi nahi dute, astelehenetik aitzinera ahalmen maximora irekitzeko, «bezeroari segurtasun handia ematen dion tresna» baita, eta sektorearen erreklamazioa baita joan den azaroaz geroztik.
Planaren aldaketa berri honetan, oraindik zehaztu gabe daude aste honetan bertan Osasun Publikoko eta Gobernuko ordezkariek ostalariekin izandako bileran aurreratu zitzaizkien xehetasun batzuk, baina orain horiek ere alda daitezke. Ez dakite Nafarroako Justizia Auzitegi Nagusiak hartutako erabakiaren ondotik barnealdeak 22:00ak edo 23:00ak arte ireki ahal izanen diren, ezta gosari, bazkari eta afarietarako ordutegi planarekin segitzen duten ere. Zehaztu gabe dago, gisa berean, bezeroen datu guztiak hartu behar ote diren, kutsadurarik izanez gero trazabilitate-prozesu bat egiteko.