Gainerako neurriak gaur egun bezala mantenduko dira, eta berrikuntzak Osasun kontseilariak emandako foru agindu batean jasoko dira. Agindu hori igande honetako 00:00etan sartuko da indarrean, eta Nafarroako Aldizkari Ofizialean argitaratu ondotik, maiatzaren 20ra arte egonen da indarrean. Hala azaldu dute gaur Javier Remírez lehen lehendakariordeak eta Santos Indurain Osasun kontseilariak, gaurko gobernu saioaren ondotik egin duten agerraldian.
Lantaldeak ostalaritzarekin eta toki-erakundeekin
Horrekin batera, Nafarroako Gobernua ostalaritzako establezimenduak eta beste jarduera batzuk pixkanaka irekitzeko plangintza egiten ari da, sektoreko ordezkariekin batera. Horretarako, arratsalde honetan bilera eginen du ordezkariekin. Hartara, neurri berriak jarriko dituzte martxan pixkanaka, egoera epidemiologikoaren asteko berrikuspenaren arabera.
Ildo beretik, Nafarroako Gobernuak Nafarroako Udal eta Kontzejuen Federazioarekin (FNMC) elkarrizketa-prozesu bati ekin dio, uda honetan herriko jaiak eta kultur ekitaldiak adosteko.
EAEko fiskaltza joan-etorriak mugatzearen eta etxeratze aginduaren kontra agertu da
Oraindik ere ez da garbi Nafarroatik Gipuzkoara eta Arabara sartzea baimendua izanen den. Izan ere, Eusko Jaurlaritzak dekretu bidez mantendu nahi ditu orain indarrean dituen neurri murriztaileak. Alabaina, EAEko fiskaltzak ez ditu argi ikusten Iñigo Urkullu lehendakariaren asmoak eta alarma egoeraren lege babesik gabe, Jaurlaritzak mugikortasuna mugatzeko eta etxeratze aginduak ezartzeko eskumenik ez duela uste du.
EAEko Justizia Auzitegi Nagusiko iturrien arabera, Administrazioarekiko Auzien Salak bihar aztertuko du Fiskaltzaren txostena eta litekeena da ebazpena ortziralean ematea.