COVID-19: Azken datuak

Berriz gora: Nafarroan 184 kasu positibo atzeman zituzten atzo, horietako 14 gure lurraldean

Alta eta bajen balantzea egin ondotik, orain 209 daude ospitalean, horietatik 35 ZIUn

Azken datuen arabera, hamalau positibo atzeman dituzte gure lurraldean: lau Leitzan, lau Baztanen, bi Urdazubin eta bana Arantzan, Lesakan, Igantzin eta Zugarramurdin. Nafarroa osoko azken datuei erreparatuta, positibotasun tasa %7,7koa da eta COVID-19agatik gaixotuta ospitalean 209 pertsona zeuden (horietatik 35 ZIUn). Atzeman zituzten 184 kutsatuen batez bertzeko adina 36,2 urtekoa da. Iazko martxoaz geroztik COVID-19aren ondorioz Nafarroan hildakoen kopurua 1.151koa zen atzo.

Gure lurraldean pandemiaren hasieratik metatutako positiboak errepasatuz gero, 448 dira Doneztebeko osasun eremuan (Malerreka+Bertizarana) atzeman dituztenak, 677 Elizondoko eremuan  (Baztan+Urdazubi+Zugarramurdi), 321 Leitzako eremuan (Arano+Areso+Goizueta+Leitza) eta 500 Bortzirietan.

Nafarroa osoko datuei dagokionez, atzo, apirilak 21, 2.396 proba egin zituzten (1.342 PCR eta 1.054 antigeno proba) eta horietatik 184k positibo eman zuten (%7,7)

COVID-19ak jota, atzo, apirilak 21, 11 pertsona ospitaleratu zituzten Nafarroan, horietatik 1 ZIUn, eta 3 hildakoren berri eman zuten. Alta eta bajen balantzea egin ondotik, orain 209 daude ospitalean, horietatik 35 ZIUn.

Ikuspegi geografikotik, Iruñean eta Iruñerrian daude positiboen %53, Tuteran %17 eta Lizarran %7. Gainerako positiboak (%23) Nafarroako bertze eskualde batzuen artean daude banatuak.
Txertaketa-planari dagokionez, Nafarroan 201.309 pertsona txertatu dituzte atzoko egunera arte. Atzo, apirilak 21, 3.299 txerto paratu zituzten eta, oraingoz, 59.207 pertsonek hartu dituzte bi dosiak.
 

Adin-tartekako kasuen banaketari dagokionez, talde nagusiak 15-29 urtekoak (%22) eta 15 urtetik beherakoak (%21) dira. Ondotik, 30-44 urteko taldeak daude (%20) eta 45-59 urtekoak (%19). Azkenik, 60 eta 75 urte bitarteko taldea dago (%12), eta 75 urtetik gorakoena (%6). Positibo berrien batez bertzeko adina 36,2 urtekoa da. Generoari dagokionez, % 52 emakumeak dira eta % 48 gizonak.

Birusak eragindako infekzioen intzidentzia metatuari dagokionez, atzoko kasuak batuz gero, 58.306 pertsonakoa da, eta heriotza kopurua 1.151koa.

 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun