COVID-19: Azken datuak

Bi positibo gehiago atzeman dituzte azken datuen arabera, bat Almandozen eta bestea Leitzan

Nafarroan 99.760 pertsona txertatu dituzte atzoko egunera arte eta, oraingoz, 31.076 pertsonek hartu dituzte bi dosiak.

Azken datuen arabera, bi positibo atzeman dituzte gure lurraldean: bat Almandozen eta bat Leitzan. Nafarroa osoko azken datuei erreparatuta, positibotasun tasa %5,7koa da eta COVID-19agatik gaixotuta ospitalean 86 pertsona zeuden (horietatik 19 ZIUn). Atzeman zituzten 66 kutsatuen batez bertzeko adina 41,8 urtekoa da. Iazko martxoaz geroztik COVID-19aren ondorioz Nafarroan hildakoen kopurua 1.121ekoa zen atzo.

Gure lurraldean pandemiaren hasieratik metatutako positiboak errepasatuz gero, 421 dira Doneztebeko osasun eremuan (Malerreka+Bertizarana) atzeman dituztenak, 603 Elizondoko eremuan  (Baztan+Urdazubi+Zugarramurdi), 282 Leitzako eremuan (Arano+Areso+Goizueta+Leitza) eta 477 Bortzirietan.

Nafarroa osoko datuei dagokionez, atzo, martxoak 21, 1.148 proba egin zituzten (756 PCR eta 392 antigeno proba) eta horietatik 66k positibo eman zuten (%5,7)

COVID-19ak jota, atzo, martxoak 21, 9 pertsona ospitaleratu zituzten Nafarroan, horietatik 3 ZIUn, eta 1 hildakoren berri eman zuten. Alta eta bajen balantzea egin ondotik, orain 86 daude ospitalean, horietatik 19 ZIUn.

Ikuspegi geografikotik, Iruñean eta Iruñerrian daude positiboen %45, Tuteran %17 eta Lizarran %24. Gainerako positiboak (%14) Nafarroako bertze eskualde batzuen artean daude banatuak.
Txertaketa-planari dagokionez, Nafarroan 99.760 pertsona txertatu dituzte atzoko egunera arte. Atzo, martxoak 21, 620 txerto paratu zituzten eta, oraingoz, 31.076 pertsonek hartu dituzte bi dosiak.
 

Adin-tartekako kasuen banaketari dagokionez, talde nagusiak 45 urtetik 59 urtera bitartekoak dira, eta 15 urtetik beheitikoak, % 20 bakoitza. Ondotik, 30 eta 44 urte bitartekoak daude (%18) eta 15 eta 29 urte bitartekoak (%16). Azkenik, 60 eta 75 urte bitarteko taldeak daude (%14), eta 75 urtetik goitikoak (%12). Positibo berrien batez bertzeko adina 41,8 urtekoa da. Generoari dagokionez, % 52 emakumeak dira eta % 48 gizonak.

Birusak eragindako infekzioen intzidentzia metatuari dagokionez, atzoko kasuak batuz gero, 52.791 pertsonakoa da, eta heriotza kopurua 1.121ekoa.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun