Espainiako Gobernuko Osasun Ministerioak urgentziazko Lurralde Arteko Kontseilua deitu zuen atzo, autonomia-erkidegoekin AstraZenecaren txertoa Espainian eten behar den aztertu eta erabakitzeko. Espainiako Gobernuak, autonomia-erkidegoekin batera, txertaketa hamabortz egunez eteteko erabakia hartu du, Sendagaien Europako Agentziak txertoa eta honen ondorioak aztertzen dituen bitartean.
Nafarroan 17.251 dosi paratu dira
Otsailaren hasieratik, Nafarroako Gobernuak AstraZenecaren 23.600 dosi jaso ditu, eta horietatik %73 erabili ditu, lehenbiziko dosia emateko (17.251). Gaur-gaurkoz, ez dute ondorio larririk egiaztatu. Nafarroara gaur bertze 3.200 txerto ziren ailegatzekoak.
Sendagaien Europako Agentzia txertoa aztertzen
Horrela, herrialdeak Sendagaien Europako Agentziak hartuko duen erabakiaren zain daude. Europan txertoa paratu duten bortz milioi pazienteen artean 30 tronbosi kasu atzeman dituzte, erakundearen arabera. Adituek, gertatutakoa «zehatz-mehatz» aztertu behar dela azpimarratu dute. Azkenik, txertoaren onurak izan ditzakeen kalteak baino nabarmen handiagoak direla erran dute.