COVID-19: Azken datuak

Zazpi positibo gehiago azken orduetan: bortz Bortzirietan eta bi Malerrekan

Ttipi-Ttapa 2021ko ots. 20a, 08:06
23 kasu positibo atzeman dituzte Beran otsailaren 1az geroztik. Baheketa urtarrilaren 31n egin zuten eta 30 eta 60 urte artekoak ez ziren baheketa egitera deituak izan.

Gaur publiko egin dituzten datuen arabera, zazpi positibo gehiago erregistratu dute gure lurraldean: bortz Bortzirietan (Bera +3 eta Lesaka +2) eta bi Malerrekan (Doneztebe +1 eta Sunbilla +1). Nafarroa osoko azken datuei erreparatuta, positibotasun tasa %3,62koa da eta COVID-19agatik gaixotuta ospitalean 130 pertsona zeuden (horietatik 23 ZIUn). Atzeman zituzten 58 kutsatuen batez bertzeko adina 39,4 urtekoa da. Iazko martxoaz geroztik COVID-19aren ondorioz Nafarroan hildakoen kopurua 1.092koa zen atzo..

Gure lurraldean pandemiaren hasieratik metatutako positiboak errepasatuz gero, 404 dira Doneztebeko osasun eremuan (Malerreka+Bertizarana) atzeman dituztenak, 570 Elizondoko eremuan  (Baztan+Urdazubi+Zugarramurdi), 257 Leitzako eremuan (Arano+Areso+Goizueta+Leitza) eta 453 Bortzirietan.

Nafarroa osoko datuei dagokionez, atzo, otsailak 19, 1.603 proba egin zituzten (861 PCR eta 742 antigeno proba) eta horietatik 58k positibo eman zuten (%3,62)

COVID-19ak jota, atzo, otsailak 19, 8 pertsona ospitaleratu zituzten Nafarroan, horietatik 0 ZIUn, eta 4 hildakoren berri eman zuten. Alta eta bajen balantzea egin ondotik, orain 130 daude ospitalean, horietatik 23 ZIUn.

Ikuspegi geografikotik, Iruñean eta Iruñerrian daude positiboen %62, Tuteran %5 eta Lizarran %2. Gainerako positiboak (%31) Nafarroako bertze eskualde batzuen artean daude banatuak.
Txertaketa-planari dagokionez, Nafarroan 51.210 pertsona txertatu dituzte atzoko egunera arte. Atzo, otsailak 19, 1.857 txerto paratu zituzten eta, oraingoz, 19.711 pertsonek hartu dituzte bi dosiak.
 

Adin-tartekako kasuen banaketari dagokionez, talde nagusia 45 eta 59 urte bitartekoa da (%29); ondotik, 15 urtetik beherakoak (%20). Gero, 30-44 urteko taldea dago (%17), atzetik 15-29 urtekoak eta 60tik 75era bitartekoak (%16, hurrenez hurren). Azkenik, 75 urtetik gorakoen taldea dago (%2). Positibo berrien batez bertzeko adina 39,4 urtekoa da. Generoari dagokionez, % 50 emakumeak dira eta % 50 gizonak.

Birusak eragindako infekzioen intzidentzia metatuari dagokionez, atzoko kasuak batuz gero, 50.721 pertsonakoa da, eta heriotza kopurua 1.092koa.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun