Mikel Irujo Garapen Ekonomikoko kontseilariak eta Elma Saiz Ekonomia eta Ogasun kontseilariak azaldu dutenez, datorren asteazkeneko Gobernu Kontseiluan onartuko dute laguntzen handitzea.
Gainera, dirulaguntza bakoitzaren muga hirukoiztu eginen dute abenduan emandako laguntzekin konparatuz gero. Horrela, kaltetuek kobratu ahal izanen duten laguntzaren gehienezko kopurua 25.000 eurotik 75.000 eurora pasako da. Bidenabar, kolektibo gehiago sartuko dituzte laguntzetan: ostalaritza, turismoko apartamentu, landetxe eta jarduera-enpresak, modulutan daudenak, bai eta enpresa sortu berriak ere. Jakitera eman dutenez, laguntzak martxoan edo apirilean kobratuko dira.
Mikel Irujo kontseilariak adierazi duenez, laguntzak eskatzeko prozedura «azkar tramitatzekoa izanen litzateke, dokumentaziorik aurkeztu gabe, modu erabat telematikoan eta banakako ebaluazioarekin».
Mikel Irujok ziurtatu du, «abenduko laguntza deialdiaren ondotik ostalariek egindako eskaera gehienak» gehitu dituztela oraingoan, eta horrek sektoreko ordezkariengan balorazio «positiboa» eragin duela uste du kontseilariak, «baina xehetasunak eman behar ditugu eta komunikazioa etengabea izanen da, orain arte bezala» gaineratu du.