COVID-19: Azken datuak

Zazpi positibo gehiago azken orduetan, guztiak Bortzirietan

Ttipi-Ttapa 2021ko urt. 26a, 08:08
Nafarroan azken 7 egunetan ospitaleratutakoen kopurua 151tik 209ra igo da, eta ZIUko ohetan 14tik 27ra. ZIUn bertze 10 ohe gaitu dituzte..

Gaur publiko egin dituzten datuen arabera, zazpi positibo gehiago erregistratu dituzte gure lurraldean, zazpiak Bortzirietan (Bera +5 eta Lesaka +2). Nafarroa osoko azken datuei erreparatuta, positibotasun tasa %8,3koa da eta Covid-19agatik gaixotuta ospitalean 205 pertsona zeuden (31 ZIUn). Atzeman zituzten 246 kutsatuen batez bertzeko adina 39,3 urtekoa da. Covid-19aren ondorioz martxoaz geroztik Nafarroan hildakoen kopurua 1.016koa da.

Gure lurraldean pandemiaren hasieratik metatutako positiboak errepasatuz gero, 370 dira Doneztebeko osasun eremuan (Malerreka+Bertizarana) atzeman dituztenak, 525 Elizondoko eremuan  (Baztan+Urdazubi+Zugarramurdi), 245 Leitzako eremuan (Arano+Areso+Goizueta+Leitza) eta 390 Bortzirietan.

Nafarroa osoko datuei dagokionez, atzo, urtarrilak 25, 2.973 proba egin zituzten (1.704 PCR eta 1.269 antigeno proba) eta horietatik 246k positibo eman zuten (%8,3)

Covid-19ak jota, atzo, urtarrilak 25, 15 pertsona ospitaleratu zituzten Nafarroan, horietatik 4 ZIUn, eta 8 hildakoren berri eman zuten. Alta eta bajen balantzea egin ondotik, orain 205 daude ospitalean, horietatik 31 ZIUn.

Ikuspegi geografikotik, Iruñean eta Iruñerrian daude positiboen %56, Tuteran %15 eta Lizarran %12. Gainerako positiboak (%17) Nafarroako bertze eskualde batzuen artean daude banatuak.
Txertaketa-planari dagokionez, Nafarroan 19.029 pertsona txertatu dituzte atzoko egunera arte. Herenegun, urtarrilak 24, 1.683 txerto paratu zituzten eta, oraingoz, 1.757 pertsonek hartu dituzte bi dosiak.
 

Adin-tartekako kasuen banaketari dagokionez, talde nagusiak 45 eta 59 urte bitartekoak dira (%23), eta 30-44 urtekoak (%20). Atzetik 15-29 urteko taldeak datoz (%20), eta 15 urtetik beherakoak (%17). Azkenik, 75 urtetik gorakoak (%10) eta 60tik 75era bitartekoak (%8). Positibo berrien batez bertzeko adina 39,5 urtekoa da. Generoari dagokionez, % 59 emakumeak dira eta % 41 gizonak.

Birusak eragindako infekzioen intzidentzia metatuari dagokionez, atzoko kasuak batuz gero, 47.080 pertsonakoa da, eta heriotza kopurua 1.016koa da.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun