COVID-19: Azken datuak

Bederatzi positibo gehiago atzeman dituzte: sei Malerrekan, bi Bortzirietan eta bat Baztanen

Ttipi-Ttapa 2021ko urt. 23a, 10:43

Gaur publiko egin dituzten datuen arabera, bederatzi positibo gehiago erregistratu dituzte gure lurraldean: sei Malerrekan (Sunbilla +5 eta Legasa +1), bi Bortzirietan (Bera +1 eta Igantzi +1) eta bertze bat Elizondon. Nafarroa osoko azken datuei erreparatuta, positibotasun tasa %7,55ekoa da eta Covid-19agatik gaixotuta ospitalean 196 pertsona zeuden (26 ZIUn). Atzeman zituzten 262 kutsatuen batez bertzeko adina 41,6 urtekoa da. Covid-19aren ondorioz martxoaz geroztik Nafarroan hildakoen kopurua 1.000koa da.

Gure lurraldean pandemiaren hasieratik metatutako positiboak errepasatuz gero, 364 dira Doneztebeko osasun eremuan (Malerreka+Bertizarana) atzeman dituztenak, 521 Elizondoko eremuan  (Baztan+Urdazubi+Zugarramurdi), 245 Leitzako eremuan (Arano+Areso+Goizueta+Leitza) eta 374 Bortzirietan.

Nafarroa osoko datuei dagokionez, atzo, urtarrilak 22, 3.313 proba egin zituzten (1.807 PCR eta 1.506 antigeno proba) eta horietatik 262k positibo eman zuten (%7,55)

Covid-19ak jota, atzo, urtarrilak 22, 11 pertsona ospitaleratu zituzten Nafarroan, 3 ZIUn, eta 1 hildakoren berri eman zuten. Alta eta bajen balantzea egin ondotik, orain 196 daude ospitalean, horietatik 26 ZIUn.

Ikuspegi geografikotik, Iruñean eta Iruñerrian daude positiboen %58, Tuteran %12 eta Lizarran %11. Gainerako positiboak (%19) Nafarroako bertze eskualde batzuen artean daude banatuak.
Txertaketa-planari dagokionez, Nafarroan 17.339 pertsona txertatu dituzte atzoko egunera arte. Atzo, urtarrilak 22, 745 txerto paratu zituzten eta 803 dira bigarren dosia jada hartua dutenak.
 

Adin-tartekako kasuen banaketari dagokionez, talde nagusiak 30 eta 44 urte bitartekoak dira (%24), eta 45 eta 59 urte bitartekoak (%20). Atzetik, 15 eta 29 urte bitarteko taldeak eta 60 eta 75 urte bitartekoak daude (%18). Azkenik, 15 urtetik beheitiko taldeak (%15) eta 75 urtetik goitikoak (%6). Positibo berrien batez bertzeko adina 41,6 urtekoa da. Generoari dagokionez, % 51 emakumeak dira eta % 49 gizonak.

Birusak eragindako infekzioen intzidentzia metatuari dagokionez, atzoko kasuak batuz gero, 46.509 pertsonakoa da, eta heriotza kopurua 1.001ekoa da.

Gizartea

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun