Koronabirusa

Erkidegoen arteko mugikortasuna baimenduko dute Eguberrietako ospakizunetan

Ttipi-Ttapa 2020ko abe. 3a, 10:15
Salvador Illa ministroa

Eguberrietan bakarrik bidaiatu ahal izanen da familiarekin elkartzeko, baina «ongi arrazoitutako eta egiaztatutako» kasuetan. Era berean, abenduaren 24ko, 25eko eta 31ko eta urtarrilaren 1eko ospakizunetan, gehienez, hamar pertsona elkartu ahal izanen dira, umeak barne; eta, etxeratze agindua, 01:30era arte luzatuko da abenduaren 24an eta 31n. Horiek dira Espainiako Gobernuak eta erkidegoek Eguberriei begira adostutako neurrietako batzuk.

Espainiako Osasun ministroak, Salvador Illak, erran du aurtengo Eguberriak «etxean gelditzeko Gabonak» direla, «zuhurtziaz» jokatu behar dela. Horregatik, bazkaltzeko edo afaltzeko ospakizun egunetan, egun seinalatuetan, gehienez, hamar pertsona elkartzea baimentzen da. «Posible bada, bizikideak diren pertsonak elkartzea litzake onena. Edo, geheinez er, bi familia bizikide».

Abenduaren 24an eta 31n, etxeratze agindua luzatu eginen dute, 01:30era arte. Luzapen hori «norbere etxera itzultzeko baliatu beharko da eta ez festan hor barrena ibiltzeko».

Erkidegoen arteko mugak, itxita

Erkidego baten barruko neurri murriztaileak zenbaterainokoak izanen diren erkidegoek eurek zehaztuko duten arren, adostutako neurrietako bat da erkidegoen arteko konfinamendu perimetralak indarrean egonen direla abenduaren 23tik urtarrilaren 6ra arte. Bertze erkidego batera joan nahi dutenek, familiarekin elkartzera doazela «egiaztatu» beharko dute. Kasu horietan bakarrik atera ahal izanen dira erkidegotik.

Pilaketarik ez

Era berean, urte bukaeran egoten diren ekitaldi jendetsuak, ahal diren neurrian, saihestu egin behar direla erran du Salvador Illak: Olentzeroren eta Mari Domingiren bisita, San Silbestre lasterketak, urte-zahar gaueko kanpaiak, Errege Magoen desfilea...

Ikasleen itzulera

Kanpoan ikasten dauden unibertsitateetako ikasleek ere izanen dute aukera etxera itzultzeko. Beraien jarduera «burbuiletara edo bizikidetza unitatera» mugatzea aholkatu diete, eta etxera itzuli aurreko hamar egunetan «jarduera soziala etetea».

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun