COVID-19: Azken datuak

Hamabi positibo gehiago azken orduetan; zazpi Bortzirietan, lau Elizondoko osasun eremuan eta bertze bat Doneztebekoan

Ttipi-Ttapa 2020ko aza. 18a, 08:04
Atzo, azaroak 17, behin betiko datuen arabera Nafarroan 158 positibo atzeman zituzten.

Azken datuen arabera bertze hamabi pertsona gehiago kutsatu dira gure lurraldean. Horietatik zazpi Bortzirietan (Bera +2, Lesaka +2, Igantzi +2 eta Etxalar +1), lau Elizondoko osasun eremuan (Elizondo +3 eta Arizkun +1) eta bat Doneztebeko eremuan (Doneztebeko +1). Leitzako osasun eremuan, aldiz, ez dute kasu berririk atzeman azken orduetan.

Gure lurraldean pandemiaren hasieratik metatutako positiboak errepasatuz gero, 300 dira Doneztebeko osasun eremuan (Malerreka+Bertizarana) atzeman dituztenak, 449 Elizondoko eremuan  (Baztan+Urdazubi+Zugarramurdi), 212 Leitzako eremuan (Arano+Areso+Goizueta+Leitza) eta 292 Bortzirietan.

Nafarroa osoko datuei dagokionez, atzo, azaroak 17, 2.815 proba egin zituzten (1.971 PCR eta 844 antigenoen testa) eta horietatik 158k positibo eman zuten (%5,6)

Covid-19ak jota, atzo, azaroak 17, 22 pertsona ospitaleratu zituzten Nafarroan, horietatik 1 ZIUn, eta 7 hildakoren berri eman zuten. Alta eta bajen balantzea egin ondotik, orain 316 daude ospitalean, horietatik 58 ZIUn.

Ikuspegi geografikotik, Iruñean eta Iruñerrian daude positiboen %54, Tuteran %14 eta Lizarran %14. Gainerako positiboak (%18) Nafarroako bertze eskualde batzuen artean daude banatuak.
 

Adin-tartekako kasuen banaketari dagokionez, talde nagusia 45 eta 59 urte bitartekoa da (%23); ondotik, 15 eta 29 urte bitartekoa (%18). Segidan, 15 urtetik beheitikoak eta 30 urtetik 44 urtera bitartekoak daude (%17, hurrenez hurren); 75 urtetik goitikoak (%15); eta, azkenik, 60 eta 75 urte bitartekoak (%10). Kasu berrien batez bertzeko adina 43,2 urtekoa da. Generoari dagokionez, % 54 emakumeak dira eta % 46 gizonak.

Birusak eragindako infekzioen intzidentzia metatuari dagokionez, atzoko kasuak batuz gero, 38.022 pertsonakoa da, eta heriotza kopurua 812koa da.

 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun