COVID-19: Azken datuak

18 positibo gehiago atzotik; 10 Elizondoko osasun eremuan, 6 Doneztebekoan eta bana gehiago Leitzako eta Bortzirietako eremuan

Ttipi-Ttapa 2020ko urr. 23a, 12:14

Azken orduetan 18 kasu berri atzeman dituzte gure lurraldean. Horietatik hamar Elizondoko osasun eremuan, sei Malerreka-Bertizaranan eta bana gehiago Leitzako osasun eremuan eta Bortzirietan. 

Gure lurraldean pandemiaren hasieratik metatutako positiboak errepasatuz gero, 233 dira Doneztebeko osasun eremuan (Malerreka+Bertizarana) atzeman dituztenak, 323 Elizondoko eremuan  (Baztan+Urdazubi+Zugarramurdi), 139 Leitzako eremuan (Arano+Areso+Goizueta+Leitza) eta 169 Bortzirietan.

Nafarroa osoko datuei dagokionez, atzo, urriak 22, 3.717 PCR eta antigeno proba egin zituzten eta horietatik 469k positibo eman zuten (%12,6)

Covid-19ak jota, atzo, urriak 22, 47 pertsona ospitaleratu zituzten Nafarroan, eta 2 hildakoren berri eman zuten. Alta eta bajen balantzea egin ondotik, orain 369 daude ospitalean, horietatik 43 ZIUn.

Ikuspegi geografikotik, Iruñean eta Iruñerrian daude positiboen %46; Tuteran %28, eta Lizarran %4. Gainerako positiboak (% 22) Nafarroako bertze eskualdeetan banatzen dira.

Adin-tarteka, talde nagusiak 30 eta 44 urte bitartekoak dira (%24), eta 45 eta 59 urte bitartekoak (%23). Ondotik, 15-29 urteko taldea dago (%20); atzetik, 15 urtetik beherakoen taldea (%17) eta, azkenik, 60 eta 75 urte bitartekoen taldea (%8). Kasu berrien batez bertzeko adina 39,6 urtekoa da. Generoari dagokionez, % 52 emakumeak dira eta % 48 gizonak.

Birusak eragindako infekzioen intzidentzia metatuari dagokionez, atzoko kasuak batuz gero, 27.410 pertsonakoa da, eta heriotza kopurua 668koa da.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun