Azken datuen arabera, 138 dira Elizondoko eremuan metatutako positiboak (Baztan+Urdazubi+Zugarramurdi), 123 Malerreka-Bertizaranan, 31 Bortzirietan eta 17 Leitzako eremuan (Arano+Areso+Goizueta+Leitza).
Atzo Nafarroa osoan 105 positibo erregistratu zituzten 1.723 PCR proba egin ondotik
Nafarroako Osasun Publikoaren Institutuak emandako datuen arabera, atzo Nafarroa osoan 105 positibo erregistratu zituzten 1.723 PCR proba egin ondotik. Gainera, 88 urteko emakume bat hil zen koronabirusak jota, eta hiru pertsona ospitaleratu behar izan zituzten.
Geografiaren ikuspegitik, Iruñerrian daude kasu berri gehienak, %42. Ondotik Tuterako Osasun eremua, kasuen %26a —gehienak Tutera hirian— eta Lizarrako Osasun eremuan %11. Hiru hiri hauen inguruko positiboek Nafarroako osoko positiboen %79a egiten dute.
Adin-tarteen arabera, 15 eta 29 urte bitarteko multzoa da nagusi, kasu guztien %36, eta, ondotik 45 eta 59 urte bitarteko multzoa, %21. Segidan, 0tik 14 urtera bitarteko taldea dago, eta 60tik 75era bitartekoa, biak kasu berrien %9arekin, eta 75 urtetik gorakoak %7arekin. Kasu berrien batez bertzeko adina 37,3 urtekoa da. Generoari dagokionez, kasuen %53 emakumeak dira, eta %47, gizonak.
Ikuspegi epidemiologikotik (hau da, kutsatzeen bilakaera eta larritasunari buruzko ikuspegitik), atzo bertze hiru ospitaleratze izan ziren Nafarroan COVID-19aren eraginez, eta pertsona bat hil zen koronabirusak jota; beraz, pandemia hasi zenetik 533 pertsona hil dira Nafarroan eta infekzioek 8.868 pertsonei eragin diete.