Nafarroak ere, dagoeneko bertze autonomia-erkidego batzuetan egin duten bezala, datozen egunotan argitaratuko du musukoaren erabilera behartzen duen araudia, pertsonen arteko segurtasun-distantzia edozein dela ere.
Erabakia koronabirus agerraldiei aurre egiteko hartuko dute, ekainaren amaieratik zortzi agerraldi zenbatu baitituzte Nafarroan. Egoera ikusita, Osasun Departamentuak hausnarketa teknikorako barne-prozesu bat jarri zuen abian, hainbat aholkulari teknikoren laguntzarekin, eta Nafarroako Gobernuak asteazkenean eginen duen bilkuran onartuko du gaur egun indarrean dagoena baino erregulazio zorrotzagoa ezartzea. Antzeko erabakia hartua dute jada Kataluniak eta Extremadurak, eta laster eginen dute Andaluziak, Aragoik, Asturiasek, Balear Uharteak, Kantabriak, Errioxak edo Murtziak.
Osasun Departamentuak dagoeneko prest du aste honetan bertan gauzatuko den proposamena. Proposamen horretan, arauaren epeak eta alderdi zehatzak finkatuko dira, hala nola espazioak, zigorrak, etab.