Koronabirusa

Maskarak derrigorrezkoak izanen dira espazio itxietan, baita karrikan ere, 2 metroko distantzia mantendu ezin denean

Esther Pascal, Agerrako tailerrean maskarak egiten.

Espainiako Gobernuak gaur argitaratu du agindua Estatuko Aldizkari Ofizialean eta horren arabera, Hego Euskal Herrian 6 urtetik goitiko guztiek maskarak derrigorrez erabili beharko dituzte gune itxietan eta karrikan bi metroko distantzia mantendu ezin denean, baita zerbitzu eta garraio publikoetan ere. Araua bihartik aitzinera sartuko da indarrean eta Covid-19ak sortu duen osasun krisiak irauten duen bitartean hala segituko du. Ikusi maskara moten inguruko informazioa.

6 urtetik goitiko herritar guztietan izanen da maskara ezinbertzekoa, eta arau horren arabera, 3 eta 5 urteko haurretan ez da derrigorrezkoa izanen, baina gomendagarria bai. Arauan «ahal izanez gero, higienikoak eta kirurgikoak» erabiltzea gomendatu du Espainiako Gobernuak, «sudurra eta ahoa» tapatzen dutenak.

Hala ere, arnasa hartzeko arazoak dituzten herritarren kasuan ez da maskararen erabilera beharrezkoa izanen, ezta beren osasun egoeragatik edo mendekotasunen bat dutelako maskara erabiltzeak kalte egin diezaieketenak ere. Gisa berean, «bateraezina den jardueretan» ere ez da derrigorrezkoa izanen, hala nola, jaterakoan edo edaterakoan.

Espainiako Gobernuaren arabera, «erabat frogatua dago maskarek kutsatutako tanten hedapena saihesten dutela eta hori hagitz garrantzitsua da segurtasun tartea mantendu ezin denean». Horrekin batera, osasun agintarien aholkuei kasu egitearen garrantziaz ohartarazi du, bertzeak bertze, segurtasun tartea mantentzeko eta eskuak garbitzeko erranez.

 

Erlazionatuak

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun