Nafarroan hildako bat eta ospitaleratze bakar bat ere ez azken 24 orduetan, daturik baxuenak hilabete honetan

Datuen eguneraketa: apirilak 27, 11:30ean   |   Epidemia hasi zenetik, 5.486 dira Nafarroako Osasunbideak baieztatu dituen positiboak, horietatik 4.733 PCR proben bitartez eta 753 antigorputzen testaren bitartez. Positibo aktiboei dagokionez (kutsatuak - sendatuak - hildakoak), 3.136 dira orain arte ofizialki zenbatuta daudenak, atzo baino 50 gutiago. Bertzalde, azken orduetan pertsona bat hil da Covid-19 birusaren ondorioz eta, hartara, 432ra igo da hildakoen kopurua. Hildako 432 pertsona horien adin-tartea 26 eta 107 urte artekoa da, eta batez bertzeko adina 83 urtekoa. Epidemia hasi zenetik, 1.918k hartu dute alta epidemiologikoa, horietatik 83k azkeneko orduotan.