Asteartetik aitzinera, zein lan jarduera daude baimenduta eta zein ez?

Apirilaren 9an funtsezkoak ez diren lan-jardueren murrizketa epea amaitu ondotik, Nafarroan asteartean itzuliko dira lanera debeku horrek eragindako langile gehienak, eta muga bakarrak martxoaren 14ko hasierako alarma-egoeraren dekretuan jasotakoak izanen dira. Hartara…

Baimenduta daude:

• Dekretuak babestu egiten ditu osasun-, segurtasun- eta telekomunikazio-jarduerak, aduanak, elikagaien eta premia biziko produktuen hornidura eta banaketa, eta energia elektrikotik, petroliotik eta gas naturaletik eratorritako produktuen hornidura.
• Gisa berean, enpresa eta industria laguntzaileen ezinbertzeko zerbitzuak ere babesten ditu –osagaiak, garbiketa, zaintza eta segurtasuna, mantentze-lanak eta premiazko matxurak, eta salgaien eta pertsonen garraioa–, aurreko enpresa eta zerbitzu osagarrien jarduerek funtziona dezaten. Baita zaborren bilketa eta ur hornidura ere.
• Garraio publikoa, nahiz eta eskaintzan murrizketak izan. Asteartetik aitzinera, gainera, maskarak banatzen hasiko dira garraio publikoan lan egiten duten langileentzat.
• Justizia Administrazioak eta sektore honi lotutako zerbitzu guztiek ere funtsezko zerbitzuen araberako jarduerari eusten diote.
• Dekretuak baimentzen dituen saltokiak honako hauek dira: elikadura-dendak, farmaziak, mediku-zentroak, optikak, ortopediak, prentsa eta papergintza, estankoak, gasolindegiak, etxeko animaliak elikatzeko dendak, teknologia dendak, internet bidezko merkataritza eta garbitegiak.
• Ile-apaindegien kasuan, etxez etxeko zerbitzua baimentzen da pertsona ahulenen arreta eta higienea bermatzeko.
• Komunikabideek ere beren jarduerari eutsiko diote.

Ez daude baimenduak:

Ez dago baimenduta tabernak eta jatetxe-establezimenduak, diskotekak, kultura- eta aisialdi-instalazioak, kirol-esparruak, jolas-parkeak eta auditorioak irekitzea. Berbenen, desfileen, besta herrikoien eta ospakizunen debekuak segitzen du eremu irekietan eta bide publikoetan.