Baztan-Bidasoaldeko udalen idatziak dioenez, «berriz ere indargabe sentitzen gara errepide madarikatu honek eragindako enegarren tragediaren aitzinean. Ez dira bi hilabete pasa Azpilkuetako bi ama-alaben heriotzaren berri izan genuela, eta asteburu honetan berriro odola gatzatu zaigu N121A errepidean gertatutako trafiko istripuaren ondorioz Igantzi eta Donostiako bi gazte hauek bizia galdu dutela ikustean».
Ukitutako familiei, «bihozmin sakoneko» momentu hauetan beraien dolumin bizienak adierazi ondotik, «atsekabe, tristura, sinesgaiztasuna eta, zergatik ez erran, gaitzespena. Horiek denak dira egun hauetan atsekabetzen gaituzten sentimenduak».
Arrazoi horiengatik, Nafarroako Gobernuari irmoki exijitzen diote bere esku dauden baliabidek guziak jar ditzala lehenbailehen odoluste honekin bukatzeko. «Halaber, eskatzen diogu, mesedez, guri aditzeko eta gure iritzia kontuan hartzeko».
Idatzia bukatzeko, udal ordezkariek diote jabetzen direla errepide honek dituen zailtasunez, baina herritarrak bidean hiltzen ari dira: «Batzuek hiru errei aipatuko dituzte, bertzeek autobidea, bertze batzuk finantzaketa dute gogoan, edo ondorio ekonomikoak, baina inork ez dezala ahantzi politikara jolasten garen bitartean herritarrak bidean gelditzen ari zaizkigula».
