Epaimahaiaren sariaz gain, ikusleena ere jokoan dago eta maiatzaren 7ra arte dago botoa emateko aukera
Gozamenez programaren baitan, Nola gozatzen duzu? galdera onarri hartuta film laburra osatzeko erronka luzatu diete gazteei eta euskaldeko bi taldek parte hartu dute: Berako Toki Ona institutuko zortzi neskek Pentsatzen hasiko bagina lanarekin eta Leitzako Amazabal institutuko DBH3ko ikasleek Gozamena, aniztasunez, askatasunez izeneko film laburrarekin. Epaimahaiaren sariaz gain, ikusleena ere jokoan dago eta maiatzaren 7ra arte dago botoa emateko aukera www.gozamenez.com orrialdean.
Gozamenez lehiaketaren helburua norberaren bizipenez eta sexualitateari buruzko ikuspegiez hausnartzea da: aniztasuna bildu eta gizartean gaiaren inguruan dagoen ikuspegia zabaltzea. Horren erakusle dira eskualdeko taldeek aurkeztutako bi film laburrak. Aipatu behar da, film labur hauek osatzeko eskualdeko gizarte hezitzaileen laguntza izan dutela: Leitza eta Goizuetan Oihane Calderonek eta Bortzirietan Arantza Gamiok gidatu dituzte. Irabazleak maiatzaren 9an jakinaraziko dituzte.