Txapelketa abiatzeko, hiruko kanporaketa jokatu zuten igandean Iruritan Urtasunek, Ezkurra II.ak eta Utergak. Iruritakoa profeta izan zen bere herrian eta bi partidak irabazi zituen, 20-13 Utergari eta 20-17 Ezkurra II.ari. Bi doneztebarren arteko lehian gazteena nagusitu zitzaion bezperan binakako txapelketa irabazia zuen Utergari (20-10). Hortaz, Urtasun izan zen lehena eta joan den urteko azpitxapeldunaren kontra, Barrenetxea IV.aren kontra ariko da ortziraleko finalaurrekoan. Ezkurra II.a, berriz, iazko txapeldunaren kontra, Urrizaren kontra.
Aipatzekoa da Gorka Urtasunek lau urtez segidan irabazi zuela txapelketa hau, 2010etik 2013ra, eta Iruritan ikusitakoaren arabera, badirudi indarrez bueltatu dela.
Finalerdiak hasi baino lehen, Nazioarteko Erremonte zirkuituko sariak banatuko dituzte eta zirkuitu hori hartu duten hirietako haurren minbizien kontrako elkarteei ere bere sariak emanen zaizkie, mila euro bakoitzari. Ortziraleko finalerdietako sarrera ere, 5 euro, ADANO elkartearen alde izanen da.