Ahobizi eta Belarriprest
16 urtetik goitiko herritarrek eman dezakete izena, Ahobizi edo Belarriprest roletako bat hartuz. Ahobizi izateko, euskaraz solastatzen jakin behar da, eta Ahobiziek euskaraz eginen diete ulertzen duten guztiei. Ezezagunekin ere lehenbiziko solasa euskaraz egiteko konpromisoa hartuko dute, eta ulertzen baldin badute, hortik aitzinerakoak ere bai.
Belarriprest izateko, berriz, euskaraz ulertu behar da. Euskaraz dakiten guztiei euskaraz egiteko gonbitea eginen diete Belarriprestek, euskara ulertzen dutela adieraziko dute eta euskaraz hitz egiteko eskatu. Berak, ordea, euskaraz edo erdaraz erantzuteko aukera izanen du.
Bi kasuetan, ez du euskaraz solastatzeko gaitasunarekin zerikusirik, jokaerarekin baizik.