Erreka bueltan-bueltan mendira
Badira urte batzuk Erreka Kirol Elkarteak antolatuta, doneztebar eta ingurukoak Urtezahar egun goizean Mendaur mendira goratzen direla. Aurten ere, ez dute hutsik eginen. 07:30ean elkartuko dira autobus geltokian eta 10:30ean aterako dute urteroko argazkia. Urtez urte, mendizale kopuruak goiti egin du, eta egun ehun lagun baino gehiago biltzen dira Mendaurreko mendi tontorrean.
Baztandarrak abenduaren 30an
Baztanen ere, joan den urtean Auzarako igoera antolatu zuten Baztango mendigoizaleek. Aurten, ordea, irteera abenduaren 30ean, larunbatean, eginen dute. 08:00etan abiatuko dira Elizondoko plazatik. Erratzutik atera eta Mendigain, Soalar, Burga, Basabar eta Istauzen barna, Auzara goitituko dira eta bueltan-bueltan ibilbidearen abiapuntura, Erratzura, ailegatuko dira.
