54 ontzako hiru enbor, 60 ontzako enbor bat eta 72 ontzako enbor bat moztu beharko dute aizkolariek. Eskualdeko hiru aizkolari ariko dira finalera sartzeko lehia horretan: berriki Nafarroako bigarren mailakoa irabazi duen Mieltxo Mindegia zubietarra, Ander Erasun aurtiztarra eta Oihan Larretxea beratarra. Bertze bi aizkolari nafar (Aitor Senosiain eta Julen Kañamares), sei gipuzkoar (Jesus Mari Mujika, Luis Mari Txapartegi, Aratz Mugertza, Xabier Zaldua, Eneko Otaño eta Julen Alberdi) eta Arkaitz Jauregi arabarra ariko dira nor baino nor gehiago. Bigarren mailakoak izan arren, ez dute parte hartuko Xabier Otañok (erretiratua) eta Xabier Orbegozok (min hartua dago).
