ELA, LAB, EHNE, ESK, STEE-EILAS eta HIRU sindikatuek ekainaren 29an deitutako greba orokorrak segida zabala izan zuen TTIPI-TTAPAk hartzen duen eskualdean. LAB sindikatuko Koldo Saenzek «banaz bertze %90eko izan duela» aipatu zuen eta ELA sindikatuko Jose Mari Arribillagak, bere aldetik, «joan den urteko maiatzaren 21ekoaren parekoa» izan zela.
Eskualdeka, grebaren eragina ezberdina izan zen. Bortzirietan eta Leitzaldean kasik erabatekoa izan zen geldialdia. Bortzirietan, lantegi nagusienetako ateak, Lesakako Arcelor-Mittal edo Zalain Transformadosekoak, itxiak egon ziren eta ez zen produkziorik izan. Leitzako Sarriopapel ere itxia egon zen. Salbuespenak salbuespen, industrialdeak geldirik zeuden. Komertzioetan ere, Lesakan %90 inguruk itxi zuen, Beran %60ak eta Leitzan ere kasik denda guziek ez zuten aterik ireki. Administrazioen arloan, Bortziriak, Malerreka eta Leitzaldeko mankomunitate eta udal bulego guziak ere itxita egon ziren, baina guttieneko zerbitzuak errespetatu ziren.
Malerrekan kasik lantegi eta komertzio guziak itxi zituzten, baina kontuan hartu behar da Donezteben San Pedro eguna zutela.
Baztanen, langileen erditsuak segitu zuen greba. Zenbait lantegi eta komertzio itxita egon ziren, baina bertze batzuk normaltasunez lan egin zuten.
Manifestazioa Lesakan
Greba egunari akabaila emateko, 400 bat lagun bildu ziren Lesakan, Etorkizun duin baten alde, Baztan Bidasoa bizirik lelopean egindako manifestazioan. ELA, LAB eta EHNEko ordezkariek eraman zuten pankarta nagusia, baina horrez gain, Saverako langileek eta Lekarozko Aroztegiako egitasmoaren kontrakoek bere eskariak ere karrikaratu zituzten. ELA eta LABeko ordezkariek grebak izandako segida azpimarratu zuten eta etorkizunean ere elkarrekin mobilizatzeko deia egin zuten.